Bu gün Azərbaycanda Milli Musiqi Günüdür.
Milli Musiqi Günü dahi bəstəkar Üzeyir Hacıbəylinin doğum günü — 18 sentyabrda qeyd olunur. 1885-ci il sentyabrın 18-də dünyaya gələn Üzeyir Hacıbəyli Azərbaycan musiqi mədəniyyətinin inkişafında mühüm rol oynayıb.
Bəstəkar, alim, yazıçı, publisist, ictimai və siyasi xadim kimi fəaliyyət göstərən Üzeyir Hacıbəyli Şərqdə ilk operanın banisi kimi tanınır.
O, Azərbaycan xalq musiqisinin toplanması və nota salınması istiqamətində də mühüm işlər görüb, marş, kantata, fantaziya, mahnı və romanslar, kamera və xor əsərləri yazıb.
2009-cu ildən etibarən hər il Üzeyir Hacıbəyliyə həsr olunmuş Beynəlxalq Musiqi Festivalı keçirilir.
Qeyd edək ki, Milli Musiqi Günü Üzeyir Hacıbəylinin Azərbaycan mədəniyyətindəki irsinin və musiqi yaradıcılığının yad edildiyi xüsusi gündür.
