Qətər İranın raket hücumları ilə bağlı BMT Nizamnaməsinin 51-ci maddəsinə uyğun olaraq cavab tədbirləri görmək hüququnu özündə saxladığını bəyan edib.
Qətər Xarici İşlər Nazirliyi bildirib ki, ölkə suverenliyini, ərazi bütövlüyünü, təhlükəsizliyini və vətəndaşlarını qorumaq üçün bütün zəruri addımları atmaq hüququna malikdir.
Bəyanatda hücumlara və onların nəticələrinə görə hüquqi məsuliyyətin İranın üzərinə düşdüyü vurğulanıb. Həmçinin İordaniya, BƏƏ, Bəhreyn, Oman və Küveytə edilən hücumlar qətiyyətlə pislənib.
Xatırladaq ki, iyulun 12-də Bəhreyn, Qətər, Küveyt, BƏƏ və Omanda raket və pilotsuz uçuş aparatları ilə hava hücumları qeydə alınıb. Qətərdə raket hücumu dəf edilsə də, qəlpələrin düşməsi nəticəsində üç nəfər, o cümlədən bir uşaq xəsarət alıb.
