Türkiyə Məkkə müqaviləsi çərçivəsində Səudiyyə Ərəbistanındakı hərbi mövcudluğunu genişləndirməyi və ölkədə öz bazasını yerləşdirməyi planlaşdıra bilər.
Məlumata görə, Ankara yaxın həftələrdə Səudiyyə Ərəbistanına məhdud sayda hərbçi və hərbi texnika göndərməyi planlaşdırır. Türkiyə 2025-ci ildən etibarən kritik əhəmiyyətli infrastrukturun qorunması məqsədilə bu ölkədə 200-dən çox hərbi mütəxəssis, texniki qrup, hava hücumundan müdafiə və radioelektron müharibə vasitələri yerləşdirib.
Pakistan, Səudiyyə Ərəbistanı və Türkiyənin üzv olduğu Məkkə Alyansının oktyabrın 5-də Ər-Riyadda qəbul etdiyi birgə müdafiə öhdəliklərinin praktiki icrası çərçivəsində Türkiyənin Səudiyyə Ərəbistanındakı dörd mühüm qaz və elektrik enerjisi obyektinin müdafiəsində iştirak edəcəyi bildirilir. Bunun üçün Türkiyənin yaxın və ortamənzilli hava hücumundan müdafiə sistemlərindən istifadə ediləcəyi qeyd olunur.
Regiona göndəriləcək hərbçilərin dəqiq sayı yaxın günlərdə müəyyənləşdiriləcək. Türkiyə hərbi kontingentinin Səudiyyə Ərəbistanına göndərilməsi üçün ölkə parlamentinin razılığı tələb olunur. Qərarın oktyabr ayında qəbul ediləcəyi gözlənilir.
Açıq mənbələrdə Türkiyənin 12 ölkədə hərbi bazasının olduğu bildirilir. Onlardan ən böyüyünün Şimali Kipr Türk Respublikasında yerləşdiyi və burada 30 mindən çox hərbçinin xidmət etdiyi qeyd olunur. Türkiyənin Qətər, İraq, Suriya, Somali və Liviya da daxil olmaqla bir sıra digər ölkələrdə də hərbi bazaları mövcuddur.
