Xankəndidə tapdığı barıtı yaşadığı binaya aparan fəhlənin ehtiyatsızlığı faciə ilə nəticələnib. Partlayış zamanı ağır yaralanan iş yoldaşı xəstəxanada ölüb.
Məlumata görə, Xankəndidə tikinti şirkətlərindən birində çalışan Abşeron rayon sakini, 1983-cü il təvəllüdlü Rəşad Əliyev inşaat sahəsində kiplənmiş barıt taparaq onu yaşadığı binaya gətirib.
Şəfəq qəsəbəsindəki evinə qayıtmağa hazırlaşan Rəşad Əliyev barıtı özü ilə aparmaq istəsə də, ölçüsü böyük olduğundan onu laqunda ilə hissələrə ayırmağa qərar verib. Kəsmə zamanı barıt alışaraq partlayışa və yanğına səbəb olub.
Hadisə nəticəsində Rəşad Əliyev və otaqda olan iş yoldaşı İsgəndər Hüseynov ağır yanıq xəsarətləri alıblar. Yaralılar xəstəxanaya çatdırılsa da, İsgəndər Hüseynovun həyatını xilas etmək mümkün olmayıb.
Polis tərəfindən saxlanılan Rəşad Əliyev barəsində cinayət işi başlanılıb. Məhkəmənin hökmü ilə o, ehtiyatsızlıqdan adam öldürməkdə təqsirli bilinərək 2 il müddətinə azadlıqdan məhrum edilib. Cəzasını məntəqə tipli cəzaçəkmə müəssisəsində çəkəcək.
