Milli Kibertəhlükəsizlik Agentliyi (MKA) “WhatsApp” və “WhatsApp Business” hesablarının kiberdələduzlar tərəfindən ələ keçirilməsi hallarının artması ilə bağlı istifadəçilərə xəbərdarlıq edib.
Agentlik vətəndaşları mümkün risklərin qarşısını almaq üçün təxirəsalınmaz təhlükəsizlik tədbirləri görməyə çağırıb.
İstifadəçilərə tətbiqin “Bağlı cihazlar” bölməsini yoxlamaq və tanımadıqları cihazlardan dərhal çıxış etmək tövsiyə olunub. Bildirilib ki, hesab telefonda normal işləsə belə, başqa cihaz vasitəsilə də istifadə edilə bilər.
Hesabların təhlükəsizliyini artırmaq üçün iki mərhələli təsdiqləmənin aktivləşdirilməsi və bərpa məqsədilə etibarlı elektron poçt ünvanının əlavə edilməsi məsləhət görülüb. Agentlik SMS təsdiq kodlarının, cihaz bağlantısı kodlarının və təhlükəsizlik PIN-kodunun heç kimlə paylaşılmamasının vacibliyini də vurğulayıb.
İstifadəçilərə özlərinin başlatmadığı giriş sorğularını təsdiqləməmək, saxta bildirişlərə və şübhəli QR-kodlara qarşı diqqətli olmaq tövsiyə edilib. “Hesabınız bağlanacaq”, “biznes hesabınızı təsdiqləyin” və ya “dəstək xidməti” adı ilə göndərilən saxta keçidlər vasitəsilə hesabların ələ keçirilə biləcəyi bildirilib.
MKA “WhatsApp” və “WhatsApp Business” tətbiqlərini yalnız rəsmi mağazalardan yükləməyi, telefon və tətbiqləri mütəmadi yeniləməyi tövsiyə edib. Biznes hesablarında bağlı cihazlara girişin yalnız səlahiyyətli əməkdaşlarla məhdudlaşdırılması, işdən ayrılan şəxslərin giriş hüquqlarının isə dərhal ləğv edilməsi vacib sayılıb.
Hesaba müdaxilə şübhəsi yarandıqda naməlum cihazlardan çıxış etmək, hesaba giriş itirildikdə isə nömrəni rəsmi tətbiqdə yenidən qeydiyyatdan keçirmək tövsiyə olunub. İstifadəçilərə, həmçinin əlaqələrini onların adından göndərilə biləcək saxta mesajlar və pul tələbləri barədə xəbərdar etmək məsləhət görülüb.
Agentlik xüsusi olaraq qeyd edib ki, iki mərhələli təsdiqləmənin aktivləşdirilməsi artıq mövcud olan icazəsiz girişləri avtomatik aradan qaldırmır. Buna görə də hesabla əlaqələndirilmiş cihazların ayrıca yoxlanılması vacibdir.
