Sahibkarlardan külli miqdarda rüşvət almaqda təqsirləndirilən Dövlət Vergi Xidmətinin iki vəzifəli şəxsi barəsində həbs qətimkan tədbiri seçilib.
Baş Prokurorluq, Baş prokuror yanında Korrupsiyaya qarşı Mübarizə Baş İdarəsi və İqtisadiyyat Nazirliyi yanında Dövlət Vergi Xidmətinin birgə məlumatına görə, aparılan araşdırmalar nəticəsində DVX-nin Bakı şəhəri Operativ vergi nəzarəti və uçotun təşkili baş idarəsinin Sahə təhkimçiliyi idarəsinin rəis müavini Rüstəm Mirzəyev və həmin idarənin 4-cü şöbəsinin rəisi Kənan Məmmədovun 2026-cı ilin may ayında Bakıdakı ticarət mərkəzlərindən birində fəaliyyət göstərən sahibkarlardan ümumilikdə 200 min manat rüşvət aldıqları müəyyən edilib.
İddialara görə, vəsait vergi yoxlamalarının keçirilməməsi, cərimələrin tətbiq olunmaması və digər qanunsuz güzəştlər müqabilində alınıb.
Toplanmış sübutlar əsasında hər iki şəxsə Cinayət Məcəlləsinin 311.3.1 və 311.3.3-cü maddələri ilə ittiham irəli sürülüb. Bakı şəhəri Binəqədi Rayon Məhkəməsinin qərarı ilə onların barəsində həbs qətimkan tədbiri seçilib.
Cinayət işi üzrə istintaq davam etdirilir, hadisədə iştirak etmiş digər şəxslərin məsuliyyətə cəlb olunması istiqamətində tədbirlər görülür.
