Rusiyanın Ukraynanın Xarkov və İvano-Frankivsk vilayətlərinə raket və dron hücumları nəticəsində 6 nəfər həlak olub, 9 nəfər yaralanıb.
Xarkov Vilayət Hərbi Administrasiyasının rəhbəri Oleq Sinequbovun sözlərinə görə, oktyabrın 11-də axşam saatlarında Rusiya qüvvələri Xarkov şəhərinin ətrafına raket zərbəsi endirib. Raket ərzaq mağazasının binasına düşüb və yanğın baş verib. Yanğın 300 kvadratmetr sahədə lokallaşdırılıb.
Hücum nəticəsində mağazanın binasına, beş avtomobilə, iki çoxmənzilli yaşayış binasına və bir fərdi evə ziyan dəyib. Hadisə zamanı üç nəfər ölüb, doqquz nəfər yaralanıb. Yaralılar arasında üç uşaq da var.
İvano-Frankivsk şəhəri də Rusiya dronlarının hücumuna məruz qalıb. Vilayət Hərbi Administrasiyasının rəhbəri Svetlana Onişukun məlumatına görə, ilkin olaraq iki nəfərin öldüyü, bir nəfərin yaralandığı bildirilmişdi. Lakin yaralı sonradan xəstəxanada vəfat edib və ölənlərin sayı üç nəfərə çatıb.
Şəhərin meri Ruslan Martsinkiv hücum nəticəsində mülki infrastruktura ziyan dəydiyini bildirib.
