Ukraynada 110 mindən çox insan xüsusi şəraitdə itkin düşmüş hesab olunur.
Ukrayna Daxili İşlər Nazirliyinin xüsusi şəraitdə itkin düşən şəxslər üzrə müvəkkili Artur Dobroserdov Bakıda keçirilən beynəlxalq konfransda bildirib ki, bu rəqəmə həm Ukrayna vətəndaşları, həm də qanuni əsaslarla ölkə ərazisində olan əcnəbilər daxildir.
Onun sözlərinə görə, xüsusi şəraitdə itkin düşmüş şəxslərin Vahid Reyestri 2023-cü ilin mayından fəaliyyət göstərir. Reyestrdə itkin şəxslərin axtarışı və taleyinin müəyyənləşdirilməsi üçün istifadə oluna biləcək məlumatlar toplanır.
Dobroserdov qeyd edib ki, reyestrdə şəxsiyyəti müəyyən edilməmiş 15 mindən çox meyit və insan qalıqları barədə də məlumat var. Bu məlumatlar, o cümlədən cəbhə xəttindən meyitlər daxil olduqca və onların repatriasiyası həyata keçirildikcə yenilənir.
Müvəkkil bildirib ki, itkin düşən şəxslərin axtarışı və identifikasiyasında Ukraynanın müxtəlif dövlət qurumları iştirak edir. Müvəkkil institutu isə onların fəaliyyətini, məlumat mübadiləsini və itkin düşənlərin yaxınları ilə kommunikasiyanı əlaqələndirir.
Onun sözlərinə görə, əsas çətinliklərdən biri Ukrayna hakimiyyətinin nəzarətində olmayan ərazilərdə yaşayan mülki şəxslərin taleyi barədə məlumat əldə etməkdir.
