Türkiyənin Muğla vilayətində başlayan irimiqyaslı meşə yanğınını söndürmək hələ də mümkün olmayıb.
NTV-nin verdiyi məlumata görə, iyulun 29-da Seydikemer rayonunda başlayan yanğın iyulun 30-u səhər saatlarınadək nəzarət altına alınmayıb.
Ehtiyat tədbiri olaraq yanğın zonasındakı 408 evdən 703 sakin təxliyə edilib. Bundan başqa, yerli dövlət xəstəxanasının 45 pasiyenti də təhlükəsiz əraziyə köçürülüb.
Muğla valiliyinin məlumatına əsasən, yanğın nəticəsində 6 bölgədə 55 tikiliyə ziyan dəyib, bəzi binalar isə tamamilə yanıb.
Alovla mübarizəyə 25 hava vasitəsi, 410 yerüstü texnika və 1 100 nəfər canlı qüvvə cəlb olunub.
Məlumata görə, Antalya, Balıkesir və İzmir vilayətlərində də meşə yanğınları davam edir. İndiyədək insan tələfatı qeydə alınmayıb. Rəsmilər turizm zonalarının yanğın ocaqlarından uzaqda yerləşdiyini və onlar üçün təhlükə olmadığını bildiriblər.
