Oktyabrın 21-də Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevə zəng edib.
Telefon danışığı zamanı dövlət başçıları Azərbaycan-Türkiyə münasibətlərini, eləcə də regional və qlobal məsələləri müzakirə ediblər.
Rəcəb Tayyib Ərdoğan Azərbaycanla Türkiyə arasında qardaşlıq münasibətlərinə əsaslanan əməkdaşlığın bundan sonra da daha yüksək səviyyəyə qalxacağına əminliyini ifadə edib.
Türkiyə Prezidenti Azərbaycanın dövlət müstəqilliyinin bərpasının 35-ci ildönümü münasibətilə təbriklərini bir daha çatdırıb. O, həmçinin İlham Əliyevi Ankarada keçiriləcək Türk Dövlətləri Təşkilatının 13-cü Zirvə Görüşünə dəvət edib.
İlham Əliyev telefon zənginə və Azərbaycanın dövlət müstəqilliyinin bərpasının 35-ci ildönümü münasibətilə ünvanlanan təbriklərə görə Rəcəb Tayyib Ərdoğana təşəkkürünü bildirib.
Azərbaycan Prezidenti də öz növbəsində iki ölkə arasındakı qardaşlıq münasibətlərinin bundan sonra da uğurla inkişaf edəcəyinə əminliyini ifadə edib.
