Estetik əməliyyatlarla bağlı məzmununa görə sosial şəbəkələrdə kəskin tənqid olunan və boykot çağırışlarına səbəb olan dondurma reklamı ətrafındakı müzakirələr davam edir. Reklamı yayımlayan şirkət artan etirazlardan sonra çarxı bütün platformalardan silsə də, reklamda rol alan aktyor Taleh Yüzbəyov videonu öz səhifəsində saxlayacağını açıqlayıb.
Aktyor bildirib ki, tənqidlər sonradan təhqirə çevrilib, hətta həyat yoldaşı və azyaşlı qızı da hədəfə alınıb.
Taleh Yüzbəyov reklamın mahiyyətinin düzgün başa düşülmədiyini iddia edərək, videoda təbii və estetik müdaxilə olunmuş gözəlliyin müqayisə edildiyini, heç birinin üstün tutulmadığını bildirib.
O, şirkətin reklamı silmək qərarına hörmətlə yanaşdığını desə də, öz mövqeyini dəyişməyəcəyini vurğulayıb:
“Bu, artıq mənim üçün prinsip məsələsidir. Heç kim mənə nəyi siləcəyimi və ya üzr istəyəcəyimi diktə edə bilməz.”
