ε-Perseid meteor yağışı sentyabrın 5-dən 21-dək aktiv olacaq.
Bu barədə Bakı Dövlət Universitetinin Fizika fakültəsinin Astrofizika kafedrasından məlumat verilib.
Bildirilib ki, meteor yağışı maksimum aktivliyinə sentyabrın 9-da çatacaq. Bakıdan baxdıqda meteor yağışı təxminən saat 19:32-də üfüqün şərq tərəfində görünəcək və səhər saatlarına qədər aktiv qalacaq.
Müşahidə üçün ən əlverişli vaxt sentyabrın 9-u gecəsi, xüsusilə gecə yarısından sonra sübhə yaxın saatlardır. Bu zaman meteor yağışının radianti səmada daha yüksək mövqedə olacaq. Əlverişli hava şəraitində saatda təxminən 4 meteor müşahidə etmək mümkün olacaq.
Meteor yağışının maksimumu Yeni Ay fazasına yaxın vaxta təsadüf edəcək. Buna görə Ay işığının müşahidələrə demək olar ki, mane olmayacağı və bunun müşahidə şəraitini yaxşılaşdıracağı bildirilir.
Meteorları izləmək üçün teleskop tələb olunmur. Meteor yağışını şəhər işıqlarından uzaq ərazidə adi gözlə müşahidə etmək mümkündür. Bunun üçün birbaşa radianta deyil, ondan təxminən 30–40 dərəcə uzaqdakı səma sahəsinə baxmaq daha məqsədəuyğundur.
Qeyd olunub ki, sentyabr ε-Perseid meteorları yüksək sürəti ilə seçilir. Onların atmosferə daxilolma sürəti təxminən 64–65 km/s təşkil edir. Meteor yağışının radianti Persey (Perseus) bürcündə, ε Persey ulduzunun yaxınlığında yerləşir.
Sentyabr ε-Perseidlərini avqust Perseidləri ilə qarışdırmaq olmaz. Avqust Perseidlərinin mənbəyi 109P/Swift–Tuttle kometi olduğu halda, sentyabr ε-Perseidlərinin ana cismi hələ dəqiq müəyyən edilməyib.
