Baş nazir Əli Əsədov dövlət ümumi təhsil müəssisələrində şagirdlərin geyim formaları ilə bağlı yeni qaydaları təsdiqləyib.
Qərarla Nazirlər Kabinetinin 2022-ci il 17 mart tarixli 96 nömrəli qərarı ilə təsdiq edilmiş “Dövlət ümumi təhsil müəssisəsi təhsilalanlarının geyim formalarının təsvirləri”nə dəyişiklik edilib. Mövcud qaydalara əsasən, şagirdlər məktəbdə müəyyən edilmiş geyim formasına uyğun geyinməlidirlər.
Yeni qaydaya əsasən, müəyyən edilmiş məktəbli formasının vahidliyini pozan, həmçinin ümumi təhsilin dünyəvilik prinsipinə uyğun olmayan digər geyim elementlərindən istifadə edilməsinə yol verilməyəcək.
Azərbaycan xalqının tarixi, mədəniyyəti və milli-mənəvi dəyərləri ilə bağlı keçirilən tədbirlər zamanı isə məktəbin Pedaqoji Şurasının qərarı ilə milli geyimlərdən və ya milli geyim elementlərindən istifadə edilə biləcək.
Bundan başqa, valideynlər və ya digər qanuni nümayəndələr övladlarının, eləcə də qəyyumluğunda və ya himayəsində olan şəxslərin geyim forması ilə bağlı tələblərə riayət etməsini təmin etməlidirlər.
Qeyd edək ki, dövlət ümumi təhsil müəssisələrində şagirdlərin geyim formalarının əsas tələbləri Nazirlər Kabinetinin 2022-ci il 17 mart tarixli 96 nömrəli qərarı ilə müəyyən edilib.
