Sabirabad rayonunda yerləşən heyvan satışı bazarı fəaliyyətini bərpa edib.
Azərbaycan Qida Təhlükəsizliyi Agentliyinin (AQTA) məlumatına görə, aparılan qiymətləndirmənin nəticəsində bazar biotəhlükəsizlik tələblərinə uyğun şəkildə yenidən qurulub.
Bildirilib ki, bazar baytarlıq-sanitariya və biotəhlükəsizlik standartlarına cavab verən infrastrukturla təmin olunub. Obyektdə baytarlıq nəzarəti üçün kliniki baxış platforması, dezbaryerlər, izolyatorlar, heyvanların çəkisinin və bədən temperaturunun ölçülməsi üçün avadanlıqlar quraşdırılıb.
Həmçinin heyvanların saxlanılması, nümayişi, yüklənməsi və boşaldılması üçün xüsusi bölmələr yaradılıb, su və yem təchizatı, işıqlandırma, eləcə də tullantıların idarə olunması sistemi tam şəkildə qurulub.
Qeyd edilib ki, bundan əvvəl Bərdə, Göygöl, Salyan, Göyçay, Şamaxı, İmişli, Ağcabədi, Beyləqan, Biləsuvar, Kürdəmir, Abşeron, Masallı, Ağsu, Xaçmaz rayonlarında və Bakının Binə qəsəbəsində yerləşən heyvan bazarları da fəaliyyətə başlayıb.
