Qazaxıstan və Azərbaycan arasında Xəzər dənizi üzərindən sərnişin daşımalarının bərpa edilməsi planlaşdırılır.
Bunu Qazaxıstanın Azərbaycandakı səfiri Alim Bayel açıqlayıb.
“Qazaxıstan və Azərbaycan Xəzərdə sərnişin daşımalarını bərpa edəcək. Azərbaycanın Qazaxıstanın təklifini dəstəkləməsindən məmnunam. Hazırda iki ölkənin nəqliyyat qurumları sərnişin əlaqələrinin mümkün qədər tez bərpa edilməsi istiqamətində işə başlayıblar”, – deyə diplomat bildirib.
Səfir qeyd edib ki, təşəbbüs Qazaxıstan tərəfindən irəli sürülüb.
Quruq və Bakı limanları arasında sərnişin daşımaları COVID-19 pandemiyası səbəbindən 2020-ci ildə dayandırılıb. Marşrut üzrə daşımalar dayandırılana qədər Xəzər dənizi vasitəsilə ildə təxminən 1 500 sərnişin daşınıb.
Marşrutun bərpasının iki ölkə arasında turizm əlaqələrinin inkişafına və Xəzər üzərindən sərnişin daşımalarının genişləndirilməsinə imkan yaradacağı gözlənilir.
