Qaxın İlisu kəndində yerləşən məşhur Ramramay şəlaləsinə giriş üçün ödəniş alınması ilə bağlı yayılan məlumatlara Ekologiya və Təbii Sərvətlər Nazirliyi aydınlıq gətirib.
Nazirlik bildirib ki, Prezidentin 2025-ci il 14 iyul tarixli sərəncamı ilə İlisu Milli Parkı yaradılıb və Ramramay şəlaləsi həmin parkın ərazisinə daxil edilib. Bu səbəbdən əraziyə giriş milli parklar üçün müəyyən edilmiş qaydalara uyğun olaraq bilet sistemi ilə tənzimlənir.
Qeyd olunub ki, milli park ərazilərində tətbiq olunan ödənişlər təbiət ərazilərinin mühafizəsinə, biomüxtəlifliyin qorunmasına, ekoturizm infrastrukturunun inkişafına və turist marşrutlarının saxlanılmasına yönəldilir.
Nazirlər Kabinetinin 21 aprel 2015-ci il tarixli qərarına əsasən, milli parklara giriş haqqı hər ziyarətçi üçün 2 manatdır. Avtonəqliyyat vasitələrinin dayanacağı üçün isə ilk saat 50 qəpik, gündəlik maksimum 5 manat ödəniş nəzərdə tutulub.
Qeyd edək ki, sosial şəbəkələrdə şəlaləyə gedən yolun girişində ödəniş məntəqəsinin yaradıldığı və bu səbəbdən turist daşıyan sürücülərin narazılıq etdiyi barədə məlumatlar yayılmışdı.
