Rusiyanın Ukraynanın Kiyev, Xarkov vilayətlərinə və Zaporojyeyə raket və pilotsuz uçuş aparatları ilə endirdiyi zərbələr nəticəsində 13 nəfər həlak olub, onlarla insan yaralanıb.
Kiyev vilayətinə raket zərbələri nəticəsində yaşayış evləri, mülki infrastruktur obyektləri və avtomobillər zədələnib, bəzi ərazilərdə yanğınlar baş verib. Xilasedicilər 48 nəfəri təxliyə edib, iki nəfəri isə dağıntılar altından çıxarıblar. Hücum nəticəsində iki uşaq olmaqla, doqquz nəfər xəsarət alıb.
Borispol şəhərində iki nəfər həlak olub, üç nəfər yaralanıb. Şəhərdə texniki xidmət stansiyasının binası da zədələnib və burada bir nəfər həyatını itirib.
Sentyabrın 1-nə keçən gecə Kiyevə endirilən zərbələr nəticəsində isə səkkiz nəfər həlak olub, beş nəfər, o cümlədən üç uşaq yaralanıb.
Darnitsa rayonunda iki ərazidə yanğın baş verib və yeddi nəfər həlak olub. Daha bir nəfər ağır vəziyyətdə xəstəxanaya yerləşdirilib. Digər ərazidə partlayış dalğası nəticəsində iki nəfər, o cümlədən bir uşaq xəsarət alıb.
Qoloseyev rayonunda qeyri-yaşayış binasına zərbə endirilib. Bir nəfər həlak olub, baş verən yanğın söndürülüb. Solomensk rayonunda PUA zərbəsi nəticəsində yaşayış binası qismən dağılıb. Xilasedicilər bir kişini təxliyə edib, bir qadını isə dağıntılar altından çıxarıblar.
Zaporojye şəhəri və vilayətinə endirilən zərbələr nəticəsində iki nəfər həlak olub, səkkiz nəfər yaralanıb.
Xarkov Vilayət Hərbi Administrasiyasının rəhbəri Oleq Sinequbovun sözlərinə görə, ötən sutka ərzində Xarkova və vilayətin 15 yaşayış məntəqəsinə zərbələr endirilib. Nəticədə üç nəfər xəsarət alıb.
