Qusar rayonunun Bədirqala kəndində 4 yaşlı uşağın ölümü ilə nəticələnən yol-nəqliyyat hadisəsi baş verib.
İlkin məlumata görə, Elçin Fətəliyev idarə etdiyi “Ford Transit” markalı avtomobillə 4 yaşlı Əliyev Yaqub Samət oğlunu vurub. Azyaşlı aldığı xəsarətlərdən hadisə yerində ölüb.
Məlumata görə, Yaqub Əliyev ötən gün anası ilə birlikdə Bakıdan Qusara qonaq gedib. Onlar avtobusdan düşərək yolu keçərkən uşaq qəfil avtomobilin qarşısına çıxıb və hadisə baş verib.
Faktla bağlı cinayət işi başlanıb, araşdırma aparılır.
DİN-in Quba regional qrupundan valideynlərə azyaşlı uşaqların yollarda təhlükəsizliyinə xüsusi diqqət yetirmələri və onların nəqliyyat vasitələrinin hərəkət etdiyi ərazilərdə nəzarətsiz buraxılmamaları ilə bağlı çağırış edilib.
Sürücülərə isə yol hərəkəti qaydalarına ciddi əməl etmələri, yaşayış məntəqələrində və piyadaların hərəkət etdiyi ərazilərdə sürət həddini aşmamaları, xüsusilə uşaqların yola çıxma ehtimalının olduğu yerlərdə diqqətli və ehtiyatlı olmaları tövsiyə olunub.
