Daxili İşlər Nazirliyinin Kibercinayətkarlıqla Mübarizə Baş İdarəsi tərəfindən ölkə ərazisində qanunsuz onlayn mərc və kazino oyunları təşkil edən şəxslərə qarşı əməliyyatlar davam etdirilir.
Kiberpolisin keçirdiyi növbəti tədbirlər nəticəsində Məhərrəm Quliyev, Sənan Fərziyev və Hikmət Həsənov saxlanılıb.
Araşdırmalarla onların ölkə ərazisində fəaliyyəti qadağan olunan “Xbet”, “MostBet” və “Vimpay” platformaları vasitəsilə vətəndaşları qanunsuz mərc oyunlarına cəlb etdikləri müəyyən olunub.
Saxlanılan şəxslərin paytaxt ərazisində icarəyə götürdükləri mənzildən qanunsuz fəaliyyətin həyata keçirilməsi üçün istifadə etdikləri texniki vasitələr, bank kartları, mobil telefonlar və nağd pul vəsaitləri aşkarlanıb.
İstintaq zamanı müəyyən edilib ki, dəstə üzvləri qeyd olunan platformalar vasitəsilə əldə etdikləri külli miqdarda pul vəsaitini müxtəlif yollarla leqallaşdırıblar.
Faktla bağlı Baş İdarədə Cinayət Məcəlləsinin müvafiq maddələri ilə cinayət işi başlanılıb. Araşdırmalar davam etdirilir.
DİN vətəndaşları sosial şəbəkələrdə və internet platformalarında təklif olunan qanunsuz kazino və qumar oyunlarında iştirak etməməyə çağırır. Belə oyunların təşkili və idarə olunması, eləcə də oyunçu qismində iştirak qanunvericiliyə uyğun olaraq hüquqi məsuliyyət yaradır.
