Azərbaycan və Almaniya enerji, nəqliyyat, ticarət və digər sahələri əhatə edən strateji tərəfdaşlıq bəyannaməsi imzalayıb.
“Euronews”un Azərbaycan Prezidenti İlham Əliyevin Almaniyaya rəsmi səfərinə həsr etdiyi məqalədə bildirilib ki, tərəflər strateji tərəfdaşlıq haqqında birgə bəyannamə ilə yanaşı, enerji, nəqliyyat, infrastruktur, ticarət, investisiya, elm və texnologiya sahələrini əhatə edən bir sıra sənədlərə imza atıblar.
Məqalədə qeyd olunub ki, bununla Almaniya İtaliyadan sonra Azərbaycanla belə bir sənəd imzalayan ikinci Avropa ölkəsi olub. Həmçinin vurğulanıb ki, Almaniya Azərbaycanın ən yeni təbii qaz alıcılarından biridir.
Bildirilib ki, Almaniya Kansleri Fridrix Merts Rusiyadan enerji asılılığının azaldılması baxımından Azərbaycanın qaz tədarükünü yüksək qiymətləndirib. Qeyd olunub ki, gələn il Almaniyaya Azərbaycan qazının illik tədarük həcminin 2 milyard kubmetrə çatacağı gözlənilir.
