Oktyabrın 14-də Azərbaycan Prezidenti İlham Əliyev və birinci xanım Mehriban Əliyeva Vyetnamın vitse-prezidenti Vo Thi An Suan ilə görüşüblər.
Görüşdə dövlət başçısı Vyetnamın vitse-prezidentinə Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Bakıda keçiriləcək Zirvə Görüşündə iştirakına görə minnətdarlığını bildirib. O, səfərin ikitərəfli məsələlərin müzakirəsi üçün də imkan yaratdığını qeyd edib.
İlham Əliyev Vyetnama, Vyetnam Kommunist Partiyası Mərkəzi Komitəsinin Baş katibi To Lamın isə Azərbaycana səfərlərini xatırladaraq, həmin səfərlər zamanı aparılan müzakirələrin əhəmiyyətini vurğulayıb. Prezident iki ölkə arasında əlaqələrin strateji tərəfdaşlıq xarakteri daşıdığını bildirib.
Dövlət başçısı Azərbaycanın AQEM-ə sədrliyinin müddətinin uzadılmasına göstərdiyi dəstəyə görə Vyetnama təşəkkür edib.
Vo Thi An Suan qəbula görə İlham Əliyevə və Mehriban Əliyevaya minnətdarlığını bildirib. O, Azərbaycanın əldə etdiyi nailiyyətləri, AQEM-ə uğurlu sədrliyini və təşkilatın Zirvə Görüşünün Bakıda keçirilməsini yüksək qiymətləndirib.
Vyetnamın vitse-prezidenti iki ölkə arasında tarixi əlaqələrə toxunaraq, To Lamın Azərbaycana səfəri zamanı strateji tərəfdaşlığın qurulması haqqında Birgə Bəyanatın qəbul edilməsinin münasibətlərin yeni mərhələyə yüksəlməsində mühüm rol oynadığını vurğulayıb.
Görüşdə Vyetnam Prezidenti Ho Şi Minin Azərbaycana, Heydər Əliyevin SSRİ rəhbərliyində olduğu dövrdə Vyetnama, eləcə də İlham Əliyevin bu ölkəyə səfərləri xatırlanıb. Bu tarixi əlaqələrin Azərbaycan-Vyetnam münasibətlərinin inkişafındakı rolu qeyd edilib.
Vo Thi An Suan Vyetnamın azadlıq mübarizəsindən sonrakı inkişafında, energetika sektorunun bərpasında və kadr potensialının hazırlanmasında Azərbaycanın vaxtilə göstərdiyi dəstəyin yüksək qiymətləndirildiyini bildirib. O, sovet dövründə minlərlə vyetnamlı tələbənin Azərbaycanda təhsil aldığını da xatırladıb.
Tərəflər beynəlxalq təşkilatlar çərçivəsində əməkdaşlığı, həmçinin iqtisadiyyat, ticarət, nəqliyyat-logistika, bərpaolunan enerji, turizm və investisiyalar sahələrində tərəfdaşlığın perspektivlərini müzakirə ediblər. Vətəndaşlar üçün viza rejiminin liberallaşdırılması imkanları barədə də fikir mübadiləsi aparılıb.
Energetika sahəsində əməkdaşlıq çərçivəsində SOCAR ilə “PetroVyetnam” arasında Anlaşma Memorandumunun imzalanması qeyd olunub və tərəfdaşlığın genişləndirilməsi məsələləri müzakirə edilib.
Vo Thi An Suan, həmçinin Mehriban Əliyevanın rəhbərlik etdiyi Heydər Əliyev Fondunun Vyetnamda həyata keçirdiyi humanitar və mədəni layihələrə görə təşəkkürünü bildirib. O, Fondun vitse-prezidenti Leyla Əliyevanın Vyetnama səfərini də məmnunluqla xatırlayıb.
