Azərbaycan Prezidenti İlham Əliyev və Çeçenistan Respublikasının başçısı Ramzan Kadırov oktyabrın 10-da “Bakı Ağ Şəhər”də olublar.
“Bakı Ağ Şəhər” layihəsinin icraçı direktoru Ruslan Sadıxov qonağa ərazidə görülən işlər və yaradılan şərait barədə məlumat verib.
Bildirilib ki, əvvəllər “Qara şəhər” kimi tanınan bu ərazi 150 ildən çox müddətdə neft sənayesinin tullantıları ilə çirklənib. Vaxtilə burada çoxsaylı neft gölməçələri mövcud olub. Azərbaycan Prezidentinin təşəbbüsü ilə ərazidə genişmiqyaslı ekoloji layihə həyata keçirilib və müasir yaşayış massivi yaradılıb.
Dünyada müasir şəhərsalma konsepsiyasının nümunələrindən biri hesab edilən “Bakı Ağ Şəhər” layihəsinin icrasına 2011-ci il dekabrın 24-də Prezident İlham Əliyevin və birinci xanım Mehriban Əliyevanın iştirakı ilə başlanılıb.
Layihə ekoloji təmizlik, dayanıqlılıq və “ağıllı şəhər” prinsipləri əsasında hazırlanıb. Ərazidə geniş küçələr, yaşıllıq sahələri və müasir heykəltaraşlıq nümunələri yaradılıb, şəhərsalmanın yeni texnologiyaları tətbiq olunub.
