Prezident İlham Əliyev sentyabrın 14-də Bakıda Elm və Təhsil Nazirliyinin Yüksək Texnologiyalar Parkında yaradılan “SABAH.city” innovasiya şəhərciyinin birinci mərhələsinin açılışında iştirak edib.
Elm və təhsil naziri Emin Əmrullayev dövlət başçısına layihə barədə məlumat verib.
Bildirilib ki, “SABAH.city” layihəsi ümumilikdə 20 hektar ərazidə həyata keçiriləcək. Birinci mərhələ 5 hektardan çox ərazini və 20 min kvadratmetrə yaxın tikili sahəsini əhatə edir. Burada 4 korpusdan ibarət kompleks inşa olunub. Şəhərcikdə 5 restoran, market, tədbirlər zalı, basketbol və futbol meydançaları, 2 padel kortu, istirahət zonaları, piyada və velosiped zolaqları, eləcə də parklanma sahələri yaradılıb.
Şəhərcikdə Bakı Dövlət Universiteti, Azərbaycan Texniki Universiteti və Azərbaycan Dövlət Neft və Sənaye Universitetində mühəndislik, informasiya texnologiyaları və tətbiqi elmlər üzrə təhsil alan 1500-dən çox tələbənin tədris və praktiki fəaliyyətə cəlb olunması nəzərdə tutulur. Layihə tam fəaliyyətə başladıqdan sonra gündəlik ziyarətçi sayının təxminən 3 min nəfər olacağı gözlənilir.
“SABAH.city”də 3 ali təhsil müəssisəsi tərəfindən yaradılan 13 tədris və tədqiqat laboratoriyası fəaliyyət göstərəcək. Laboratoriyalarda süni intellekt, robototexnika, kompüter elmləri, kibertəhlükəsizlik, biotexnologiya, nanobiologiya, nanofizika, kimya və telekommunikasiya kimi istiqamətlər üzrə tədqiqatlar aparılacaq.
Şəhərcikdə, həmçinin 12 startapın yer aldığı kovorkinq zonası və texnologiya şirkətləri, korporativ tədqiqat və inkişaf mərkəzləri üçün 22 ofis sahəsi yaradılıb.
Burada ASAN Süni İntellekt Mərkəzi də fəaliyyət göstərəcək. Mərkəzin məqsədi süni intellekt sahəsində innovativ təşəbbüsləri dəstəkləmək, tədqiqatçıları, dövlət qurumlarını, özəl sektor və fərdi istifadəçiləri vahid rəqəmsal platformada bir araya gətirməkdir. Bildirilib ki, indiyədək mərkəz tərəfindən 50 süni intellekt həlli təqdim olunub.
Layihənin birinci mərhələsinə 3 ali təhsil müəssisəsi, 8 texnologiya və innovasiya yönümlü şirkət və 12 startap olmaqla, ümumilikdə 23 əsas ekosistem iştirakçısı cəlb edilib.
“SABAH.city”nin yaradılmasında əsas məqsəd elm, təhsil, innovasiya və yüksək texnologiyalar sahəsində fəaliyyət göstərən əsas iştirakçıları vahid məkanda bir araya gətirmək və onların əməkdaşlığı üçün müasir innovasiya mühiti formalaşdırmaqdır.
