Azərbaycan Prezidenti İlham Əliyev oktyabrın 10-da Rusiya Federasiyasının Çeçenistan Respublikasının başçısı Ramzan Kadırovu qəbul edib.
Görüşdə İlham Əliyev Azərbaycan və çeçen xalqları arasında qardaşlıq münasibətlərinin qədim tarixə malik olduğunu, hazırda da dostluq, həmrəylik və əməkdaşlığın davam etdiyini bildirib. Prezident Çeçenistanın inkişafı və əhalinin rifahının yaxşılaşdırılması istiqamətində əldə olunan uğurlara görə Ramzan Kadırovu təbrik edib.
Ramzan Kadırov Azərbaycanla Çeçenistanı bir çox amillərin birləşdirdiyini vurğulayıb. O, Azərbaycan Prezidenti Heydər Əliyev ilə Çeçenistanın ilk prezidenti Əhməd Kadırov arasında mövcud olmuş qardaşlıq münasibətlərini xatırladaraq deyib ki, bu səfəri qonşulara deyil, qardaşlara səfər hesab edir.
Kadırov Bakı-Qroznı təyyarə qəzası ilə bağlı başsağlığı verib
Çeçenistan rəhbəri 2024-cü ilin dekabrında Bakı-Qroznı marşrutu üzrə uçuş həyata keçirən təyyarənin qəzaya uğraması ilə əlaqədar Azərbaycan xalqına bir daha başsağlığı verib.
“Biz qardaş Azərbaycan xalqının kədərini səmimi-qəlbdən bölüşürük və həlak olanların hamısının ruhuna dualar edirik”, – deyə Ramzan Kadırov bildirib.
O, həmçinin Azərbaycan xalqını Qarabağ məsələsinin həlli münasibətilə təbrik edib və bölgədə sülhün, sabitliyin davam edəcəyinə əminliyini ifadə edib.
İdman sahəsində əməkdaşlıq məsələsi də müzakirə olunub
Ramzan Kadırov Bakıda keçirilən cüdo üzrə dünya çempionatına toxunaraq Azərbaycan idmançılarını qazandıqları nəticələr münasibətilə təbrik edib. O, Çeçenistanda Vladimir Putin adına cüdo üzrə Olimpiya Hazırlığı Mərkəzinin fəaliyyət göstərdiyini xatırladıb və birgə idman tədbirlərinin faydalı olacağını bildirib.
İlham Əliyev isə Azərbaycan və çeçen xalqları arasında münasibətlərin möhkəmlənməsində hər iki xalqın liderlərinin mühüm rol oynadığını vurğulayıb. Prezident Çeçenistanda sabitliyin və təhlükəsizliyin möhkəmləndirilməsi, iqtisadi və sosial inkişaf sahələrində əldə olunan uğurlardan məmnunluğunu ifadə edib.
Görüşdə müxtəlif sahələrdə əməkdaşlığın perspektivləri müzakirə olunub.
