Avqustun 11-də Azərbaycan Respublikasının Prezidenti İlham Əliyev və birinci xanım Mehriban Əliyeva Naxçıvan şəhərində istifadəyə veriləcək yeni elektrik avtobuslarına baxıb, həmçinin muxtar respublikanın dəmir yolu infrastrukturunda aparılan yenidənqurma işləri ilə tanış olublar.
Prezidentə Zəngəzur dəhlizi üzrə dəmir yolu layihələri barədə məlumat verilib. Layihələr tamamlandıqdan sonra dəmir yolunun illik buraxılış qabiliyyətinin 15 milyon ton olacağı bildirilib.
Naxçıvan dəmir yolu xəttinin uzunluğunun yeni layihə üzrə 194,2 kilometrə çatdırılması, 10 stansiya və 3 sərnişin platformasının yenidən qurulması nəzərdə tutulur. Hazırda Salamməlik stansiyasından Ermənistanla dövlət sərhədinədək 7 kilometrlik hissədə tikinti işləri aparılır.
Naxçıvan şəhərinin ictimai nəqliyyatında isə ölkədə yığılan 60 ədəd “BYD” markalı elektrik avtobusundan istifadə olunacaq. Avtobuslarda bank kartı, QR kod, “Apple Pay” və “Google Pay” vasitəsilə nağdsız ödəniş imkanı yaradılıb.
Layihə çərçivəsində şəhərdə 9 marşrut xətti üzrə il ərzində 4,5 milyon sərnişinə xidmət göstərilməsi planlaşdırılır.
