Azərbaycan Prezidenti İlham Əliyev sentyabrın 2-də Birləşmiş Millətlər Təşkilatının (BMT) Azərbaycanda yeni təyin olunmuş rezident əlaqələndiricisi Dmitri Şlapaçenkonu qəbul edib.
Dmitri Şlapaçenko etimadnaməsini dövlət başçısına təqdim edib.
Görüşdə Azərbaycanla BMT arasında əməkdaşlığın müxtəlif istiqamətləri müzakirə olunub.
Prezident İlham Əliyev Azərbaycanda COP29 və Ümumdünya Şəhərsalma Forumu kimi genişmiqyaslı BMT tədbirlərinin keçirildiyini qeyd edib. Dövlət başçısı bu il BMT-nin Sivilizasiyalar Alyansı ilə birlikdə Mədəniyyətlərarası Dialoq Forumunun da təşkil ediləcəyini bildirib.
Dmitri Şlapaçenko Azərbaycanın BMT-nin mühüm tərəfdaşı olduğunu vurğulayıb. O, Bakıda COP və Ümumdünya Şəhərsalma Forumunun keçirilməsini qeyd edib, həmçinin 4-cü Beynəlxalq Minatəmizləmə Konfransının təşkil olunduğunu və Azərbaycanda BMT-nin İqlim Həftəsi tədbirinin keçiriləcəyini bildirib.
BMT-nin Azərbaycandakı rezident əlaqələndiricisi Azərbaycanın təşkilatın müvafiq qurumlarının fəaliyyətinə verdiyi dəstəyi yüksək qiymətləndirib. O, BMT-nin Azərbaycanın həyata keçirdiyi inkişaf proqramına öz təcrübəsi ilə dəstək verməyə hazır olduğunu bildirib və Qarabağda, eləcə də Şərqi Zəngəzurda aparılan genişmiqyaslı işlərin əhəmiyyətinə toxunub.
Görüşdə mina problemi də müzakirə olunub. Dmitri Şlapaçenko BMT-nin bu sahədə Azərbaycana dəstək göstərməyə və öz təcrübəsini bölüşməyə hazır olduğunu bildirib.
Prezident İlham Əliyev isə işğaldan azad edilmiş ərazilərdə aparılan genişmiqyaslı bərpa və quruculuq işlərindən danışıb. Dövlət başçısı Azərbaycanın üzləşdiyi mina probleminin miqyasını qeyd edərək, bunun bərpa-quruculuq işlərinə mane olduğunu, buna baxmayaraq, ölkənin minatəmizləmə sahəsində fəaliyyətini ardıcıl şəkildə davam etdirdiyini vurğulayıb.
Dmitri Şlapaçenko yaxın zamanda Qarabağa səfər edəcəyini bildirib. O, BMT Günü ilə əlaqədar Qarabağ Universitetində böyük tədbirin keçirilməsinin planlaşdırıldığını da qeyd edib.
Görüş zamanı Cənubi Qafqaz regionunda transsərhəd çayların ekoloji vəziyyətinin yaxşılaşdırılması və bu sahədə monitorinqlərin aparılması, həmçinin Xəzər dənizində su səviyyəsinin azalması kimi ekoloji məsələlər də müzakirə olunub.
