Ermənistanın Baş naziri Nikol Paşinyan 8 avqust 2025-ci ildə keçirilən Vaşinqton sammitinin ölkəni “dalandan çıxardığını” və Ermənistan qarşısında yeni perspektivlər açdığını bildirib.
Paşinyan bu barədə Azərbaycan, Ermənistan və ABŞ liderlərinin Vaşinqtonda keçirilən üçtərəfli görüşünün birinci ildönümü ilə bağlı müraciətində danışıb.
O qeyd edib ki, sülh gündəliyinin həyata keçirilməsi prosesi hələ başa çatmayıb. Paşinyanın sözlərinə görə, 8 avqust 2025-ci ilədək Ermənistan “dalan” vəziyyətində olub, sammitdən sonra isə ölkə qarşısında “hüdudsuz perspektivlər” açılıb.
Baş nazir Vaşinqton sammitinin əsas nəticələrindən biri kimi “Tramp Marşrutu” (TRIPP) layihəsini də qeyd edib. O bildirib ki, layihə Ermənistan və region iqtisadiyyatının əsas elementlərindən birinə çevrilə bilər.
Paşinyan yaxın vaxtlarda TRIPP-in praktiki icrasına başlanacağını və bunun böyük regional və beynəlxalq hadisə olacağını vurğulayıb.
Ermənistan hökumətinin başçısı həmçinin Azərbaycanla Ermənistan arasındakı münaqişə səhifəsinin bağlandığını və sülhün vətəndaşların gündəlik həyatının bir hissəsinə çevrildiyini bildirib.
