Ermənistanın Baş naziri Nikol Paşinyan və Rusiya Prezidenti Vladimir Putin telefon danışığı zamanı iki ölkə arasında iqtisadi münasibətlərdə yaranmış problemləri müzakirə ediblər.
Ermənistan hökumətinin məlumatına görə, Paşinyan erməni mənşəli məhsulların Rusiya bazarına ixracına tətbiq olunan məhdudiyyətlərin Ermənistan-Rusiya hüquqi bazasına və Avrasiya İqtisadi İttifaqının (Aİİ) qaydalarına zidd olduğunu bildirib. O, problemin həlli üçün tədbirlər görülməsinə çağırıb və məsələlərin tərəfdaşlıq və dostluq dialoqu ilə həllinə hazır olduqlarını vurğulayıb.
Telefon danışığında Ermənistanın Avropa İttifaqına üzvlüyü məsələsi də müzakirə olunub. Paşinyan qeyd edib ki, Aİ-yə üzvlüklə bağlı referendum yalnız Ermənistanın rəsmi üzvlük müraciəti təqdim etməsindən sonra keçirilə bilər.
Kremlin məlumatına əsasən isə söhbət Ermənistan tərəfinin təşəbbüsü ilə baş tutub və ölkədə Avropa İttifaqına inteqrasiya ilə Avrasiya İqtisadi Birliyində qalmaq arasında seçimə dair ümumxalq referendumunun keçirilməsinin vacibliyi vurğulanıb.
