Ermənistanın Baş naziri Nikol Paşinyan müxalifətə qarşı sərt açıqlama verib. O, “Üçbaşlı müharibə partiyası”nın məhv edildiyini bildirib və yerli özünüidarəetmə orqanlarına seçkilərin nəticələrinin bunu sübut etdiyini deyib.
Qeyd edək ki, Paşinyanın bu ifadəsi müxalif “Ermənistan” bloku, “Güclü Ermənistan” və “Çiçəklənən Ermənistan” partiyalarına aiddir.
Baş nazirin sözlərinə görə, Ermənistanda casusluqla məşğul olan və xaricdən idarə edilən müxalifətin kökünü kəsmək lazımdır.
“Ermənistanda yeni, dövlətyönümlü müxalifət formalaşmalıdır, lakin onu hökumət formalaşdırmamalıdır”, – Paşinyan bildirib.
O, həmçinin yeni müxalifətin formalaşması ilə bağlı ictimai müzakirələrin təşkil edilməsinin vacibliyini vurğulayıb.
Qeyd edək ki, Ermənistanın Mərkəzi Seçki Komissiyası oktyabrın 25-də proporsional seçki sistemi üzrə 19 icmanın ağsaqqallar şuralarına keçirilən seçkilərin ilkin nəticələrini açıqlayıb.
Nəticələrə əsasən, hakim “Mülki müqavilə” partiyası 16 icmada ən çox səs toplayıb. Qavar və Gorusda isə hakim partiyanın da daxil olduğu “Həmrəylik” blokları liderlik edir. Stepanavanda ən çox səsi “Sahibkar” partiyası qazanıb.
Armavir, Vardenis, Qarni, Axuryan və Vaykda isə seçkilərdə yalnız “Mülki müqavilə” partiyası iştirak edib.
