Ermənistanın Baş naziri Nikol Paşinyan ölkənin sabiq prezidenti Robert Köçəryanın həbsi ilə bağlı danışıb və onun dövründə korrupsiya sxemlərinin mövcud olduğunu bildirib.
Paşinyan hökumət iclasından sonra keçirilən brifinqdə Köçəryanın sərvətinin mənbəyini sual edib. O, sabiq prezidentin biznes fəaliyyəti ilə bağlı açıqlamalarını tənqid edib.
“İndi heç kim sual vermir: Robert Köçəryanda bu milyardlar haradandır? O deyir: “Biz bizneslə məşğul olmuşuq”. Kimi aldadırlar? Yəni onlar belə uğurlu iş adamlarıdır, biz isə ümumiyyətlə heç kimdən heç nə müsadirə edə bilmərik? Bəs onların “Toyota İrəvan”da şəxsi payının olması – bu biznes fəaliyyətidir?! İrəvanın mərkəzində torpaqları qəsb edib onları alış qiymətindən 20-30 dəfə baha satmaq biznesdir?!”, – Paşinyan deyib.
Baş nazir korrupsiya sxemlərinin ləğvini əhəmiyyətli məsələ adlandırıb.
“Həm Robert Köçəryan, həm Serj Sarqsyan, həm də Qaqik Tsarukyan öz qanuni pensiyaları və qanuni gəlirləri ilə yaşamalıdırlar. Qanunsuz yolla əldə edilənlər isə qəpiyinə qədər dövlətə və onun xalqına qaytarılmalıdır! Başqa variant yoxdur. Əgər bu baş verməzsə, bu o deməkdir ki, yeni inqilab baş verməlidir”, – Paşinyan vurğulayıb.
