Avqustun 8-də Ermənistanın Baş naziri Nikol Paşinyan Azərbaycan Prezidenti İlham Əliyevə telefonla zəng edib.
Telefon danışığı zamanı tərəflər ABŞ Prezidenti Donald Trampın dəstəyi ilə 2025-ci il avqustun 8-də Vaşinqtonda keçirilmiş Sülh Sammitinin birinci ildönümü və Azərbaycanla Ermənistan arasında Sülh Sazişinin mətninin ilkin paraflanması ilə bağlı fikir mübadiləsi aparıblar.
Tərəflər sülh prosesinin irəlilədilməsində Donald Trampın və ABŞ hökumətinin mühüm rolunu xüsusi vurğulayıblar.
Söhbət zamanı ötən il ərzində Azərbaycan və Ermənistan arasında münasibətlərin normallaşdırılması istiqamətində əldə olunan irəliləyiş də qeyd edilib.
İki ölkə arasında iqtisadi və ticarət əlaqələrinin inkişafının sülhün konkret nəticələrindən biri olduğu bildirilib. Bu çərçivədə Azərbaycanın neft məhsullarının Ermənistana ixracı, həmçinin tranzit yüklərin Azərbaycan ərazisindən Ermənistana və Ermənistandan digər istiqamətlərə daşınması vurğulanıb.
Tərəflər, həmçinin Vaşinqtonda əldə olunan razılaşmalara uyğun olaraq TRIPP marşrutunun icrası məsələsini müzakirə ediblər.
Söhbət zamanı regionda davamlı sülh və sabitliyin, bağlantıların və iqtisadi əməkdaşlığın təmin olunması istiqamətində səylərin davam etdirilməsinin vacibliyi vurğulanıb.
