Nepalda genişmiqyaslı daşqın nəticəsində itkin düşənlərin sayı 1 924 nəfərə çatıb, 579 nəfər həyatını itirib.
Məlumata görə, itkin düşənlər arasında 517 əcnəbi vətəndaş var. Daşqından zərər çəkən çaylar boyunca yerləşən hidroenergetika obyektlərində çalışan 933 nəfər də itkin hesab olunur.
Çinin Tibet bölgəsində isə 558 nəfər itkin düşmüş sayılır, beş nəfər ölüb. İtkinlər arasında 260 xarici vətəndaşın olduğu bildirilir.
Daşqın avqustun 26-da Nepalın Çinlə sərhəd bölgəsində baş verib. Fəlakətə buzlaqın çökməsi səbəb olub. Nəticədə nəhəng su, daş və palçıq axını yaranıb, ardınca çaylarda suyun səviyyəsi kəskin yüksəlib.
Xilasetmə əməliyyatları davam edir. Dağılan yollar və körpülər səbəbindən fəlakət bölgələrinə giriş çətin olaraq qalır. İnsanların axtarışı və humanitar yardımların çatdırılması üçün helikopterlərdən istifadə olunur.
