Mərakeşin Aqadir şəhərində Böyük Britaniyadan olan ər-arvadın qazdan zəhərlənmə ehtimalı ilə mehmanxanada həyatını itirdiyi bildirilir.
“Maghreb Times”ın məlumatına görə, iki turistin meyiti mehmanxana nömrələrindən birində aşkarlanıb.
Nəşrin mənbəsi bildirib ki, həmin mehmanxanada qalan daha iki Fransa vətəndaşı da ciddi şəkildə zəhərlənərək xəstəxanaya yerləşdirilib.
İlkin ehtimala görə, britaniyalı turistlərin ölümünə və fransalı turistlərin zəhərlənməsinə mehmanxana nömrələrində qaz sızması səbəb ola bilər.
Hadisənin dəqiq səbəbi araşdırılır. Məhkəmə-tibbi ekspertizasının və zərərçəkənlərin müayinəsinin nəticələrinin qazın növünü və sızma mənbəyini müəyyənləşdirməyə kömək edəcəyi gözlənilir.
Aqadirin hüquq-mühafizə orqanları prokurorluğun nəzarəti altında araşdırmanı davam etdirir.
