Mənzil İnşaatı Dövlət Agentliyi (MİDA) Lənkəran, Şirvan və Yevlax şəhərlərində yerləşən yaşayış komplekslərində ümumilikdə 535 güzəştli mənzilin satışını həyata keçirəcək.
Agentliyin məlumatına görə, satış sentyabrın 4-də saat 11:00-dan 16:00-dək elektron qaydada təşkil olunacaq. Mənzillərdən 528-i Şirvan, 6-sı Yevlax, 1-i isə Lənkəran Yaşayış Kompleksində yerləşir.
Mənzillərin əldə edilməsi Prezidentin 16 noyabr 2016-cı il tarixli fərmanına uyğun olaraq Elektron Hökumət İnformasiya Sisteminə inteqrasiya edilmiş “Güzəştli mənzil” sistemi vasitəsilə həyata keçiriləcək.
Elektron kabineti olan bütün vətəndaşlar qeydiyyat tarixindən və sıra nömrəsindən asılı olmayaraq mənzil seçimində bərabər hüquqa malikdirlər.
Satışa çıxarılan bütün mənzillər tam təmirli vəziyyətdə, mətbəx mebeli, kombi isitmə sistemi, su, qaz və elektrik sayğacları ilə təmin olunub. Mənzillərə mülkiyyət hüququnu təsdiq edən dövlət reyestrindən çıxarışlar da təqdim edilir.
