Dövlət İmtahan Mərkəzi (DİM) 2026/2027-ci tədris ili üzrə ali təhsil müəssisələrinin magistratura səviyyəsinə qəbul müsabiqəsinin nəticələrini elan edib.
DİM-in məlumatına görə, ixtisaslaşma seçimində iştirak edən 15 721 bakalavrdan 13 845 nəfər magistraturaya qəbul olunub.
Qəbul olunanlardan 6 580 nəfər dövlət sifarişi, 52 nəfər dövlət hesabı, 7 213 nəfər isə ödənişli əsaslarla təhsil alacaq. Onların 10 510-u cari ilin, 3 335-i isə əvvəlki illərin məzunlarıdır.
Bakalavrlar nəticələrini mobil operatorlar (Azercell, Bakcell və Nar) vasitəsilə də öyrənə bilərlər. Bunun üçün ixtisaslaşma seçimi ərizəsində göstərilən 7 rəqəmli kodu 7727 nömrəsinə SMS göndərmək kifayətdir.
Qəbul olunanların siyahısı iyulun 30-da günün ikinci yarısında “Magistr” jurnalının 5-ci sayında dərc olunacaq.
Magistraturaya qəbul olunan şəxslər avqustun 3-ü saat 15:00-dan avqustun 12-si saat 18:00-dək my.gov.az portalı vasitəsilə elektron qeydiyyatdan keçməlidirlər. Qeydiyyatdan keçməyən şəxslər qəbul olunduqları ixtisas üzrə təhsildən imtina etmiş hesab ediləcəklər.
Boş qalan plan yerlərinə əlavə yerləşdirmənin vaxtı barədə məlumat isə DİM tərəfindən daha sonra açıqlanacaq.
