Səhiyyə Nazirliyi lisenziya olmadan kosmetoloji fəaliyyət göstərdiyi müəyyən edilən fərdi sahibkar Canlı Elnarə Fəxrəddin qızı ilə bağlı hüquq-mühafizə orqanlarına müraciət edib.
Bu barədə nazirliyin Analitik Ekspertiza Mərkəzi (AEM) məlumat yayıb.
Bildirilib ki, Elnarə Canlının fəaliyyəti ilə bağlı vətəndaş müraciətləri və mediada yayılan məlumatlar əsasında AEM tərəfindən bir neçə dəfə araşdırma və plandankənar yoxlama aparılıb.
2025-ci il mayın 8-də keçirilən yoxlama zamanı onun Bakı şəhəri, Yasamal rayonunda müvafiq lisenziya olmadan özəl tibb fəaliyyəti, o cümlədən kosmetoloji xidmət göstərdiyi müəyyən edilib. Bununla bağlı fərdi sahibkar barəsində İnzibati Xətalar Məcəlləsinin 210.1-ci maddəsi ilə inzibati xəta haqqında protokol tərtib edilərək aidiyyəti üzrə göndərilib.
Daha sonra həmin şəxsin fəaliyyəti ilə bağlı daha iki plandankənar yoxlama keçirilib. Yoxlamalar zamanı da inzibati məsuliyyət yaradan pozuntular müəyyən edilib və 210.1-ci maddə üzrə daha iki protokol tərtib olunaraq icraata göndərilib.
AEM tərəfindən həyata keçirilən yoxlamalara və tətbiq olunan inzibati tədbirlərə baxmayaraq, Elnarə Canlının lisenziyasız kosmetoloji fəaliyyətini davam etdirdiyi müəyyən olunub.
Bununla əlaqədar onun fəaliyyətinin dayandırılması istiqamətində əlavə hüquqi tədbirlərin görülməsi məqsədilə Səhiyyə Nazirliyi martın 13-də Baş Prokurorluğa müraciət edib.
