Heydər Əliyev Fondunun vitse-prezidenti Leyla Əliyeva Özbəkistanın Səmərqənd şəhərində “Uşaqların rifahına investisiya” Ümumdünya Sammiti çərçivəsində keçirilən Uşaq Onkologiyası üzrə II Beynəlxalq Konqresin açılışında iştirak edib.
Tədbirdə çıxış edən Leyla Əliyeva konqresin yüksək səviyyədə təşkilinə görə təşkilatçılara təşəkkür edib, uşaqlarda onkoloji xəstəliklərlə mübarizədə beynəlxalq əməkdaşlığın əhəmiyyətini vurğulayıb.
“Hər bir uşaq hörmətə, qayğıya və dolğun həyat yaşamaq imkanına layiqdir”, – deyən Leyla Əliyeva bildirib ki, müalicə sahəsində əldə olunan irəliləyişlərə baxmayaraq, uşaqların və onların ailələrinin ümidini qorumaq üçün birgə səylər davam etdirilməlidir.
“Biz bütün dünyada uşaqlara kömək etməyə, onlara ümid verməyə çalışırıq. Azərbaycanda da bu sahə diqqət mərkəzində saxlanılır. 2012-ci ilin martında ölkəmizdə Uşaq Onkoloji Klinikasının açılışı olub. Bu, Milli Onkologiya Mərkəzinin regionda ilk uşaq klinikasıdır”, – deyə o əlavə edib.
Heydər Əliyev Fondunun vitse-prezidenti uşaq onkologiyası sahəsində mütəxəssislərin və təşkilatların səylərini birləşdirən təşəbbüslərin əhəmiyyətinə də toxunub. O, uşaq xərçəngi ilə mübarizə üzrə koalisiyanın yaradılmasını bu istiqamətdə irəliyə doğru atılmış mühüm addım kimi qiymətləndirib.
Azərbaycanda onkoloji xəstəliklərdən əziyyət çəkən uşaqlara göstərilən dəstəkdən danışan Leyla Əliyeva tibbi yardımın dövlət tərəfindən maliyyələşdirildiyini, uşaqlara və onların ailələrinə dəstəyin davam etdirildiyini vurğulayıb. O bildirib ki, heç kim bu çətin sınaqla təkbaşına mübarizə aparmalı deyil.
Çıxışında sağlamlığın emosional tərəfinə və onun fiziki vəziyyətlə əlaqəsinə diqqət çəkən Leyla Əliyeva deyib: “Biz xərçəng xəstəliyini öyrənməyə davam edərkən sağlamlığın emosional tərəfini diqqətdən kənarda qoymamalıyıq. Beynimizlə bədənimiz arasındakı əlaqə çox dərindir. Emosional sarsıntıların, stresin və ətraf mühitin sağlamlığımıza necə təsir etdiyini hələ də araşdırmalıyıq”.
O, uşaqların ətraflarında baş verənlərə həssas yanaşdıqlarını, valideynlərin emosional vəziyyətinin və ailə mühitinin onlara əhəmiyyətli təsir göstərdiyini qeyd edib.
“İbn Sinanın da qeyd etdiyi kimi, xəstəliyi müalicə edərkən onun səbəblərini nəzərə almaq lazımdır”, – deyə Leyla Əliyeva bildirib.
Vurğulanıb ki, tibbi müalicə üsullarının inkişafı ilə yanaşı, uşaqlara psixoloji dəstək göstərilməsinə də diqqət yetirilməli, onların sevgi, hörmət və anlayış mühitində böyüməsi təmin olunmalıdır.
Sonda uşaqların həyat şəraitinin yaxşılaşdırılması üçün çalışanlara təşəkkür edən Leyla Əliyeva onların yalnız zəruri müalicə almaqlarının deyil, həm də dolğun həyat yaşamaq imkanına sahib olmalarının vacibliyini qeyd edib.
Konqresin açılışında, həmçinin Özbəkistan Prezident Administrasiyasında səhiyyə islahatları üzrə rəhbər müavini Tamila Əliyeva, Qazaxıstanın səhiyyə naziri Akmaral Alnazarova və Qırğızıstanın səhiyyə naziri Damirbek Osmonov çıxış ediblər.
