Oktyabrın 20-də Türkmənistanın paytaxtı Aşqabadda Heydər Əliyev Fondunun vitse-prezidenti Leyla Əliyeva, Qurbanqulu Berdiməhəmmədov adına Qayğıya ehtiyacı olan uşaqlara yardım üzrə Xeyriyyə Fondunun tibb sahəsi üzrə vitse-prezidenti Oğulcahan Atabayeva və Özbəkistan Respublikası Prezidenti Administrasiyasının rəhbəri Saida Mirziyoyevanın üçtərəfli görüşü keçirilib.
Oğulcahan Atabayeva Aşqabadda keçiriləcək MAMA “Ana təbiət” beynəlxalq incəsənət sərgisinin ölkələri ümumi mənəvi-mədəni dəyərlər və sosial-humanitar məsələlərə oxşar yanaşmalar əsasında birləşdirən mühüm hadisə olduğunu bildirib. O, ətraf mühitin mühafizəsi və regional, beynəlxalq qurumlar çərçivəsində əməkdaşlığın əhəmiyyətini vurğulayaraq sərginin təbiətin qorunması istiqamətində real addım olacağına əminliyini ifadə edib.
Leyla Əliyeva birgə səylərlə bir çox mühüm ekoloji layihənin həyata keçirilməsinin mümkünlüyünü qeyd edib. Xeyriyyə Fonduna səfərini xatırladan Fondun vitse-prezidenti uşaqlara göstərilən yüksək qayğının şəxsən şahidi olduğunu bildirib və sərginin xeyirxahlığa doğru daha bir addım olacağını deyib.
Saida Mirziyoyeva isə bu cür görüşlərin yeni imkanlar açdığını, insanlara qayğı göstərmək və gələcəyi bu dəyər üzərində qurmaq kimi ümumi arzunu birləşdirməyə imkan verdiyini vurğulayıb. O qeyd edib ki, hər bir uşaq üçün ən vacib məqam anasının yanında özünü qayğı və təhlükəsizlik içində hiss etməsi, sevildiyinə və hər zaman eşidiləcəyinə əmin olmasıdır.
