Daxili İşlər Nazirliyinin (DİN) Kibercinayətkarlıqla Mübarizə Baş İdarəsi (KMBİ) tərəfindən dövlət qulluqçuları və hüquq-mühafizə orqanlarının əməkdaşlarının adından istifadə edilməklə törədilən kiberdələduzluq hallarına qarşı əməliyyat keçirilib.
Əməliyyat zamanı saxta sosial şəbəkə profilləri və “WhatsApp” hesabları vasitəsilə kiberdələduzluq əməllərində şübhəli bilinən Fərid Əliyev, Asiman Zeynalov, Tofiq Əliyev, Fərid Atakişiyev, Röyal Abdullayev, Anar Məmmədov, Rəşad Hacıyev və Həmid Əliyev saxlanılıblar.
Araşdırmalarla müəyyən edilib ki, saxlanılan şəxslər xaricdə fəaliyyət göstərən kibercinayətkar qruplaşmaların üzvləri ilə əlaqə yaradaraq onları yerli mobil operatorlara məxsus elektron nömrələr, qanunsuz fəaliyyətlərdə istifadə olunan bank kartları və digər məlumatlarla təmin ediblər. Həmin nömrə və kartlardan kiberdələduzluq əməllərinin törədilməsində istifadə olunub.
Əməliyyat zamanı 2 mindən artıq bank kartı və elektron mobil nömrənin qanunsuz yolla əldə edilərək cinayətkar fəaliyyətə yönləndirildiyi müəyyən olunub. Həmçinin həmin kart və nömrələrin bir hissəsinin qanunsuz onlayn qumar və kazino oyunlarının təşkili zamanı istifadə edildiyi aşkarlanıb.
Hazırda saxlanılan şəxslərin ətrafında əməliyyat-istintaq və əməliyyat-texniki tədbirlər davam etdirilir. Xaricdə fəaliyyət göstərən kibercinayətkar qruplaşmaların digər iştirakçılarının müəyyən edilərək məsuliyyətə cəlb olunması istiqamətində də tədbirlər görülür.
DİN vətəndaşlara bank kartı məlumatlarını və mobil nömrələri üçüncü şəxslərə təqdim etməməyə çağırıb. Bank kartından və ya mobil nömrədən qanunsuz istifadə edildiyi, hesaba mənbəyi şübhəli pul vəsaitlərinin köçürüldüyü, şübhəli SMS-lərin daxil olduğu və ya ödəniş müqabilində kart məlumatlarının təqdim edilməsinin təklif edildiyi hallarda dərhal polis orqanlarına məlumat verilməsi tövsiyə olunur
