Rusiya qoşunları avqustun 20-nə keçən gecə Ukraynanın paytaxtı Kiyevə və Kiyev vilayətinə ballistik və hipersəsli “Sirkon” raketləri, həmçinin dronlarla kütləvi zərbələr endirib.
Hücum nəticəsində Kiyevdə 3 nəfər ölüb, 20 nəfər yaralanıb. Yaralılardan 14-ü xəstəxanaya yerləşdirilib.
Paytaxtın Solomyanski rayonunda doqquzmərtəbəli yaşayış binasına zərbə nəticəsində binanın yuxarı mərtəbələri dağılıb və yanğın baş verib. Məktəb binası və uşaq xəstəxanası da zərər görüb.
Svyatoşinski rayonunda anbarlar, Darnitski rayonunda isə qeyri-yaşayış binaları yanıb. Svyatoşinski və Solomyanski rayonlarının bəzi hissələrində elektrik enerjisinin verilişi dayandırılıb.
Kiyev vilayətinin Brovarı rayonunda da hücum nəticəsində 1 nəfər ölüb, 1 nəfər yaralanıb. Sənaye obyektinə ziyan dəyib və yanğın baş verib.
Bundan əlavə, Rusiya qoşunları Jitomir şəhərinə reaktiv dronlarla hücum edib. Zərbələrdən biri Milli Polisin qərargahına endirilib. Ukrayna Milli Polisinin rəhbəri vəzifəsini icra edən Maksim Suskiridzenin sözlərinə görə, hadisə nəticəsində 2 polis əməkdaşı ölüb, azı 20 nəfər yaralanıb.
