Rusiya qoşunlarının Ukraynanın Kiyev şəhərinin Darnitsa rayonunda yerləşən dəmir yolu müəssisəsinə endirdiyi ballistik zərbə nəticəsində “Ukrzaliznitsya”nın əməkdaşı həlak olub.
“Ukrzaliznitsya”nın İdarə Heyətinin sədri Aleksandr Pertsovskinin məlumatına görə, zərbə Darnitsa rayonundakı dəmir yolu müəssisələrindən birinə endirilib. Hadisə zamanı bir briqadir həlak olub, digər əməkdaşlar isə ilk zərbədən sonra ərazidən təxliyə ediliblər.
Bundan başqa, Odessa vilayətinin Razdelnaya stansiyasında yerləşən dəmir yolu vağzalı da hücum nəticəsində zədələnib.
Zaporojye Vilayət Hərbi Administrasiyasının rəhbəri İvan Fyodorovun məlumatına görə, Rusiya qoşunları sutka ərzində vilayətin 42 yaşayış məntəqəsinə 539 zərbə endirib.
Hücumlar nəticəsində 3 nəfər həlak olub, 19 nəfər, o cümlədən 2 uşaq yaralanıb.
Bundan əlavə, yaşayış evləri, avtomobillər və infrastruktur obyektlərinin zədələnməsi ilə bağlı 71 məlumat daxil olub.
