Kənd Təsərrüfatı Nazirliyində insan resurslarının idarə edilməsində rəqəmsal transformasiyanın genişləndirilməsi istiqamətində növbəti layihə – Mərkəzləşdirilmiş İşə Qəbul Portalı istifadəyə verilib.
Portal Nazirlik sistemində dövlət qulluğu üzrə vəzifələr istisna olmaqla, vakant vəzifələr üzrə işə qəbul prosesinin vahid platforma üzərindən həyata keçirilməsini təmin edəcək.
Yeni sistem vasitəsilə namizədlərin müraciət imkanlarının genişləndirilməsi, işə qəbul prosesinin daha şəffaf, operativ və səmərəli təşkili hədəflənir.
Layihənin ilkin mərhələsində vətəndaşların işə qəbul üzrə müraciətlərinin elektron qaydada qəbul edilməsi təmin olunub. Namizədlər portalda şəxsi kabinet yaradaraq fərdi məlumatlarını və tələb olunan sənədləri real vaxt rejimində idarə edə bilirlər.
Portal, həmçinin işə qəbul ilə bağlı müraciətlərin səmərəli idarə olunmasına və prosesin bütün mərhələlərinin mərkəzləşdirilmiş qaydada həyata keçirilməsinə imkan verir.
Növbəti mərhələdə portalın funksional imkanlarının genişləndirilməsi nəzərdə tutulur. Bu çərçivədə Nazirliyin tabeli qurumlarında vakansiyaların vahid platforma üzərindən idarə olunması, mərkəzləşdirilmiş imtahan və qiymətləndirmə mexanizmlərinin tətbiqi, işə qəbul prosesinin bütün mərhələlərinin tam rəqəmsal idarə olunması, eləcə də süni intellekt əsaslı həllər vasitəsilə namizədlərin uyğunluğunun təhlili və analitik hesabatların hazırlanması planlaşdırılır.
Portalın tətbiqi ilə Nazirlik sistemində insan resurslarının idarə edilməsində vahid yanaşmanın formalaşdırılması, namizədlər üçün bərabər imkanların yaradılması və inzibati yükün azaldılması hədəflənir.
Kənd Təsərrüfatı Nazirliyi dövlət idarəçiliyində müasir rəqəmsal həllərin tətbiqini, insan resurslarının idarə olunmasında innovativ yanaşmaların genişləndirilməsini və vətəndaş məmnuniyyətinin artırılmasını prioritet istiqamətlərdən biri kimi davam etdirəcək.
