Ali təhsil müəssisələrinə ixtisas seçiminin avqustun 10-dan sonra başlanılması planlaşdırılır.
Bunu Dövlət İmtahan Mərkəzinin aparat rəhbəri Vəfadar Misirov jurnalistlərə açıqlamasında deyib.
Onun sözlərinə görə, yaxın üç gün ərzində qəbul imtahanlarının nəticələri ilə bağlı apellyasiya müraciətləri qəbul ediləcək, bundan sonra isə onların emalına başlanılacaq.
V.Misirov bildirib ki, qabiliyyət imtahanları da paralel şəkildə davam edir. Əksər qabiliyyət imtahanları yaxın üç gündə yekunlaşacaq, idman istiqaməti üzrə imtahanlar isə avqustun 7-dək davam edəcək. Bu mərhələ başa çatdıqdan sonra ixtisas seçimi prosesinə start veriləcək.
DİM rəsmisi qeyd edib ki, müsabiqə vəziyyətini düzgün qiymətləndirmək üçün bal paylanması və plan yerləri barədə məlumatların açıqlanması vacibdir. Bu məlumatlar avqustun əvvəlində nəşr olunacaq “Abituriyent” jurnalının 4-cü nömrəsində və apellyasiya, eləcə də qabiliyyət imtahanlarının nəticələri tam yekunlaşdıqdan sonra təqdim ediləcək broşuralarda yer alacaq.
Onun sözlərinə görə, həmin məlumatlar abituriyentlərə topladıqları bala uyğun ixtisasları daha düzgün qiymətləndirməyə və seçimlərini daha düşünülmüş şəkildə etməyə imkan verəcək.
