Fransadan sonra İtaliyada da bahalaşmaya, yanacaq qiymətlərinə və vergilərə qarşı keçirilən etiraz aksiyaları iğtişaşlarla müşayiət olunub.
Yerli medianın məlumatına görə, Milanda qara geyimli gənclər hüquq-mühafizə orqanlarının əməkdaşlarına əldəqayırma yandırıcı qurğular, metal hasarlar və butulkalar atıblar.
Təhlükəsizlik qüvvələri nümayişçiləri dağıtmaq üçün gözyaşardıcı qaz və su şırnaqlarından istifadə edib. Lakin onlar geri çəkilməyə məcbur olublar, bundan sonra etirazçılar əsas meydanı tutublar.
“Sky TG24” telekanalının məlumatına görə, Berqamo, Bolonya, Milan və Turində baş verən toqquşmalar zamanı 197 nəfər saxlanılıb. Saxlanılanlar arasında 12 yetkinlik yaşına çatmayan şəxs və altı əcnəbi də var. Hadisələr zamanı 141 polis əməkdaşı yaralanıb.
İtaliyanın Baş naziri Corcia Meloni iğtişaşları pisləyib. O bildirib ki, nümayiş keçirmək hüquqdur, lakin şəhərləri yandırmaq hüquq deyil.
