İraq Kürdüstanının Regional Hökumətinin Baş nazirinin ofisinə iki pilotsuz uçuş aparatı (PUA) ilə zərbə endirilib.
Xəbər Mərkəzi Reuters-ə istinadən xəbər verir ki, bu barədə Kürdüstan Regional Hökumətinin təhlükəsizlik agentliyi məlumat yayıb.
Bəyanata əsasən, PUA-lar İran ərazisindən buraxılıb. Hücumların Kürdüstan Regional Hökumətinin Baş naziri Məsrur Bərzaninin şəxsi ofisini və regionun təhlükəsizlik və kəşfiyyat qurumunun rəhbərinin iqamətgahını hədəf aldığı bildirilib.
İlkin məlumata görə, insan tələfatı qeydə alınmayıb. Hücum nəticəsində mümkün dağıntılar barədə isə əlavə məlumat verilməyib. Hadisə ilə bağlı araşdırma aparılır.
Kürdüstan Regional Hökumətinin Baş naziri Məsrur Bərzani hücumu pisləyərək bunu regionun təhlükəsizliyi və sabitliyinə birbaşa təhdid və təhlükəli eskalasiya kimi qiymətləndirib.
