Avqustun 28-də 2026-cı ilin son tutulma hadisəsi baş verəcək.
Tutulma qismən Ay tutulması olacaq. Bu zaman Yerin kölgəsi Ayı tamamilə örtməyəcək. Qismən Ay tutulması Ayın Yerin kölgəsinə tam daxil olmadığı halda baş verir.
Tutulma avqustun 28-də saat 05:23-də başlayacaq və saat 11:01-də başa çatacaq. Hadisə Avropa, Afrika, Şimali və Cənubi Amerika, eləcə də Sakit, Atlantik və Hind okeanlarında müşahidə olunacaq.
Azərbaycanda saat 05:35-də artıq mülki alaqaranlıq vaxtı olduğundan Ay üfüqdən yuxarıda olacaq. Lakin tutulmanın başlamasından cəmi 12 dəqiqə sonra hava işıqlanacaq. Bu müddət isə tutulmanın yarımkölgəli fazasına düşəcək. Yarımkölgəli Ay tutulmasını adi gözlə müşahidə etmək çətindir və yalnız Ayın işığının cüzi azalması hiss oluna bilər.
2026-cı ildə daha əvvəl iki Günəş və bir Ay tutulması baş verib. Bu tutulmaların heç biri Azərbaycan ərazisindən müşahidə olunmayıb.
2027-ci ildə isə ümumilikdə beş tutulma hadisəsi baş verəcək. Onlardan ikisi Günəş, üçü isə Ay tutulması olacaq.
Fevralın 21-də baş verəcək yarımkölgəli Ay tutulması və avqustun 2-də baş verəcək tam Günəş tutulması Azərbaycandan müşahidə olunacaq. Günəş tutulması zamanı Azərbaycan tam kölgə zolağına düşməyəcəyindən hadisə ölkə ərazisindən qismən Günəş tutulması kimi görünəcək.
