Horadiz–Ağbənd avtomobil yolunun tikintisi yekunlaşmaq üzrədir. Eyni zamanda, dəmir yolu xəttinin inşasında da son mərhələyə çatılıb.
Bunu Prezidentin Cəbrayıl, Qubadlı və Zəngilan rayonlarında xüsusi nümayəndəsi Vahid Hacıyev Diaspor Gənclərinin VII Yay Düşərgəsinin açılış mərasimində çıxışı zamanı deyib.
Onun sözlərinə görə, bir çox şirkətlər bölgədə anbar kompleksləri və logistika mərkəzləri yaratmaq, yükdaşıma və saxlama imkanlarını genişləndirməkdə maraqlıdır. Bu layihələrin regionun iqtisadi inkişafına və beynəlxalq nəqliyyat qovşağına çevrilməsinə mühüm töhfə verəcəyi bildirilib.
Vahid Hacıyev qeyd edib ki, “Böyük Qayıdış” yalnız insanların doğma yurdlarına dönməsi deyil, həm də biznesin, təhsilin, xidmət sektorunun və yeni imkanların bölgəyə qayıdışı deməkdir.
O vurğulayıb ki, dövlət bu məqsədlə vergi və gömrük güzəştləri tətbiq edir, sahibkarlar üçün maliyyə mexanizmləri yaradır və investorlara geniş dəstək göstərir. Hazırda Qarabağ və Şərqi Zəngəzur iqtisadi rayonlarında Ağdam Sənaye Parkı və Cəbrayılda yerləşən Araz Vadisi İqtisadi Zonası fəaliyyət göstərir. Araz Vadisi İqtisadi Zonasında 19-dan çox rezident şirkət fəaliyyət göstərir və ya layihələrini icra edir. Bəzi müəssisələr artıq istifadəyə verilib və bölgəyə qayıdan sakinlər həmin müəssisələrdə çalışırlar.
