Ermənistan-Azərbaycan sülh prosesi yalnız kağız üzərində yazılmış bəyanatdan ibarət deyil və Azərbaycan bunu əməli addımları ilə sübut edib.
Bunu Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Türkiyənin “Milliyət” qəzetinə müsahibəsində deyib.
Onun sözlərinə görə, Ermənistanın Azərbaycana qarşı törətdiyi cinayətlərə baxmayaraq, Azərbaycan yalnız sülh niyyətini nümayiş etdirib.
“Cənubi Qafqazda hazırda sülh hökm sürür. Əgər Ermənistan-Azərbaycan müharibəsi davam etsəydi, qonşu ölkələrdə baş verən münaqişələrin qığılcımları regionumuza da sıçraya bilərdi”, – Hacıyev bildirib.
Prezidentin köməkçisi qeyd edib ki, Ermənistan hakimiyyəti “real Ermənistan” konsepsiyasını qəbul etməklə yeni geosiyasi reallığı nəzərə almağa başlayıb.
“Onlar anlayıblar ki, işğal siyasəti uzun illər özlərini əsir vəziyyətində saxlayıb və bunun yanlış yol olduğunu dərk ediblər. Ermənistan artıq Azərbaycan və Türkiyə ilə münasibətlərin öz inkişafı üçün vacibliyini qəbul edir”, – o vurğulayıb.
Hikmət Hacıyev əlavə edib ki, Zəngəzur dəhlizinin açılması həm Azərbaycanın, həm də Ermənistanın maraqlarına cavab verir və regionda yeni geosiyasi reallığın ayrılmaz hissəsinə çevrilib.
