Suriyanın Hələb vilayətinin cənubunda, Əl-Əys yaşayış məntəqəsi yaxınlığında Suriya ordusunun obyektlərindən birinin ərazisində yerləşən silah-sursat anbarında silsilə partlayışlar baş verib.
Suriya Ərəb Xəbər Agentliyinin (SANA) məlumatına görə, əvvəlcə güclü partlayış qeydə alınıb, daha sonra ərazidə bir sıra digər partlayışlar baş verib. Yerli mənbələr hadisənin Suriya Müdafiə Nazirliyinə məxsus silah-sursat anbarında baş verdiyini bildiriblər.
Suriya Mülki Müdafiə Xidmətinin məlumatına görə, partlayışlar nəticəsində azı 4 nəfər yaralanıb və onlar ərazidən təxliyə ediliblər. Davam edən partlayışlar xilasedicilərin hadisə yerinə tam şəkildə yaxınlaşmasına mane olub.
Hələb qubernatoru Azzam əl-Qərib sakinlərə evlərindən çıxmamaq və partlayışların baş verdiyi əraziyə yaxınlaşmamaq çağırışı edib. Təhlükəsizlik tədbirləri çərçivəsində hadisə yerinə aparan yollar, o cümlədən Hələb-Dəməşq avtomobil yolu bağlanıb.
Partlayışların səbəbi hələlik açıqlanmayıb və hadisə ilə bağlı araşdırma aparılır.
