Ermənistan hökuməti Azərbaycanla sülh prosesini rəsmiləşdirmək, Türkiyə ilə münasibətləri normallaşdırmaq, eləcə də Avropa İttifaqı, ABŞ, İran və Gürcüstanla strateji əlaqələri, Rusiya ilə isə çoxşaxəli münasibətləri inkişaf etdirmək niyyətindədir.
Bu barədə Baş nazir Nikol Paşinyanın hökumətin iclasında təqdim etdiyi 2026–2031-ci illər üzrə hökumət proqramında qeyd olunub.
Proqramın xarici siyasət bölməsində bildirilib ki, Ermənistan Azərbaycanla sərhədin delimitasiyası və sülhün institusionallaşdırılması istiqamətində işləri davam etdirəcək. Buraya sülh müqaviləsinin və digər hüquqi sənədlərin imzalanması, həmçinin iki ölkənin vətəndaş cəmiyyəti və işgüzar dairələri arasında əlaqələrin genişləndirilməsi daxildir.
Ermənistan hökuməti Türkiyə ilə də diplomatik münasibətlərin qurulmasını və sərhədin ən azı iki müasir nəzarət-buraxılış məntəqəsi vasitəsilə açılmasını planlaşdırır. Hazırda Ermənistan tərəfində belə məntəqələrdən biri – Armavir vilayətindəki Marqara keçid məntəqəsi hazırlanıb.
Bundan əlavə, Ermənistan Türkiyə ilə enerji infrastrukturunun yenidən işə salınmasını da nəzərdə tutur.
